Premyer Liqanın debütantı “Karvan-Yevlax” hələ ki, məğlubiyyət acısı dadmayıb.

Açılış turunda “Qəbələ” ilə bərabərə qalan (1:1) “ağ-qaralar” ötən həftə “Kəpəz”i məğlub etməyi bacarmışdı – 3:2.

Bu dəfəki rəqib kim olsa yaxşıdır? Tanıtmaya ehtiyacı olmayan “Qarabağ”!

Əslində, rəqibin adının, statusunun, imicinin, bir sözlə, kölgəsinin belə, yevlaxlıların canına qorxu salması anlaşılandır. Söhbət cəmi 2 aydır birlikdə olan kollektivlə ardıcıl 12 il avrokubokların qrup mıərhələsinə vəsiqə qazanan komandanın duelindən gedirsə, nələrin yaşanacağını təsəvvür etmək çətin deyil.

Lakin bəzi faktlar var ki, “Karvan-Yevlax”ı bir xeyli ümidləndirir.

Məsələn, ağdamlıların “Ferenetsvaroş”la ağır oyundan çıxması. Məlumdur ki, Qurban Qurbanov əsas heyətdə yer alanların demək olar heç birinə “11-lik”də şans verməyəcək. İlk dəqiqədən meydana çıxanlar əsasən ehtiyat oyunçular skamyasından tanıdıqlarımız olacaq.

Onların nəyə qadir olduğunu bir həftə əvvəl “Sumqayıt”la oyunda görmüşdük. İkinci heyətdə anlaşma baxımından ciddi problemin olması danılmaz faktdır. 0:1 uduzduqları görüşün 60-cı dəqiqəsinə qədər 100 faizlik qol imkanı yaratmaqda çətinlik çəkirdilər.

Yalnız Zubir, Kadi, Andrade kimi “as”ların mübarizəyə qoşulmasından sonra “Qarabağ” müəyyən qədər özünə oxşamağa başladı. Lakin qol vurmaq mümkün olmadı.

Süni örtük amili “Qarabağ”ın ən yaralı yeridir. Bu komandanın suyunu kəs, yeməyini vermə, ancaq “sintetika”da oyna demə. Qurban Qurbanov bununla bağlı narazılığını dəfələrlə dilinə gətirib.

Üstəlik, matçın günün istisində, Şamaxıdakı meydanın ən “ağır” vaxtında, saat 17:00-da start götürməsi ağdamlıların əhvalına “soğan doğrayacaq”. “Qarabağ”dakılar özlərini zədədən qorumağa çalışacağı dəqiqələrdə, “Karvan”ın üzvləri çempiondan xal qoparmaq üçün ayaqlarının sınmasına da razı olacaq.

Ötən tur “Kəpəz” üzərində əldə olunan 3:2 hesablı qələbənin yaratdığı psixoloji yükəlişin özü də nominal meydan sahiblərinin xeyrinə işləyəcək.

Avqustun 31-də Şamaxı şəhər stadionunda gerçəkləşəcək oyun saat 17:00-da start götürəcək.

HƏBİB / SPORTİNFO.AZ