UEFA Çempionlar Liqasının bu mövsümkü liqa mərhələsinin püşkatma mərasimi baş tutdu.

8 ildən sonra 36 xoşbəxt arasında bizim "Qarabağ" da vardı.

Monakoda yerləşən inzibati binada təşkil edilən tədbirin yekun nəticəsi heç də qəlblərə xoş toxunmadı.

Dördüncü səbətdə yer alan Azərbaycan çempionu "Qarabağ"ın rəqibləri "Çelsi" və "Liverpul", "Benfika", "Ayntraxt", "Ayaks", "Napoli", "Atletik" və "Kopenhagen" olub.

"Qarabağ" Bakıda "Çelsi", "Ayntraxt", "Ayaks" və "Kopenhagen"i qəbul edəcək. "Liverpul", "Benfika", "Napoli" və "Atletik"lə oyunlar isə səfərdə olacaq.

İlk başdan onu deyək ki, ÇL-in əsas mərhələsində "Qarabağ"dan hər hansı gözlənti yoxdur. Burada olmaqdan doyunca həzz almaq lazımdır.

Edə biləcəyimiz hansısa sürpriz əyləncəmizi bir qədər də artıra bilər.

Ki, Ağdam klubunun hansısa oyunlarda bunu edəcəyinə şübhəm yoxdur.

Çempionlar Liqası üçün bir qədər münasib qrup olduğunu da demək olar.

Sözümüzün müstafasından uzaqlaşmamış qayıdaq mətləbə - Bəs bizi üzən nədir?

Məsələn, "Liverpul" və "Napoli" ilə matçları Bakıda canlı izləmək təsəlli ola bilərdi.

Tərslikdən futbolsevərlər həmin görüşləri ekran başından izləməli olacaq.

"Real", "Barselona", "Mançester Siti, "Bavariya" kimi nəhənglərin Bakıya gəlmək şanslarının puç olması isə daha ağır dərddir.

Min bir əziyyətlə bu cür nüfuzlu yarışa vəsiqə qazanasan, amma dünya nəhəngləri sənin yox, "Kayrat"ın, "Pafos"un bəxtinə düşə.

Oyunlar da doğma divarlar arasında.

Yəqin ki, hər kəs qazaxıstanlı futbolçuların İspaniya nəhənginə rəqib olmalarını necə sevinclə qarşıladığını gördü.

Əminəm ki, əksi "Qarabağ" cəbhəsində yaşanıb.

Axı 34 yaşlı Abdullah Zubirin, Kevin Medinanın "Real", "Barselona", "Bavariya" ilə meydanda üz-üzə gəlməsi üçün böyük ölçüdə son şansı idi.

Bəlkə elə digərı futbolçularımızın da.

Təəssüf ki, bu baxımdan nə azarkeşlərin, nə də futbolçuların xəyalları gerçək olmadı deyə bilərik.

XANOĞLAN / SPORTİNFO.AZ