Azərbaycan millisinin və "Neftçi"nin sabiq baş məşqçisi Arif Əsədov Sportinfo.az-a açıqlama verib.
Təcrübəli mütəxəssis "Qarabağ"ın Çempionlar Liqasının pley-off mərhələsində "Ferentsvaroş"u mübarizədən kənarlaşdıraraq Çempionlar Liqasına vəsiqə qazanmasını şərh edib.
Əsədov ilk öncə bu uğur münasibəti ilə komanda üzvlərini və Azərbaycan xalqını təbrik edib:
"İlk öncə Azərbaycan xalqını möhtəşəm uğur münasibəti ilə təbrik edirəm. "Qarabağ"a təşəkkür düşür.
Bütün kollektivi təbrik edirəm. Növbəti dəfə Azərbaycan futbol tarixinə düşdülər.
Klub futbolumuzu uğurla təmsil etməyə davam edirlər. Buna görə əsas memar Qurban Qurbanova da böyük təşəkkür düşür".
O, Bakıdakı görüşün çətin keçdiyini sözlərinə əlavə edib:
"Belə çətin olacağı gözlənilirdi. Psixoloji gərginlik vardı.
"Qarabağ" uzun müddət idi Çempionlar Liqasının qrup mərhələsinə düşməyə çalışırdı, amma olmurdu. Bu da istər-istəməz gərginlik yaradırdı.
Baxmayaraq ki, rəqib meydanında inamlı qələbə əldə olunmuşdu. "Ferentsvaroş" xarakterli komanda idi. Evdəki məğlubiyyətə rəğmən Robbi Kin futbolçularını görüşə yaxşı kökləmişdi.
Oyun istənilən kimi alınmasa da əsas odur ki, sonda komanda istədiyi nəticəni əldə etdi. Bir daha təbrik edirəm".
XANOĞLAN
