"Qarabağ"ın sabiq qapıçısı Andrey Lunyov 2024-cü ildə onun üçün ən yaddaqalan hadisənin Avropa Liqasında "Bayer 04"ə qarşı keçirdikləri oyunlar olduğunu bildirib.
Sportinfo.az xəbər verir ki, 33 yaşlı rusiyalı qolkiper bu barədə TASS-a açıqlamasında deyib.
"Ötən il kifayət qədər məhsuldar, normal olub. 2024-cü ildə ən yaddaqalan hadisələr, yəqin ki, Avropa Liqasındakı oyunlar, konkret desək, "Bayer 04"ə qarşı matçlar idi", - deyə o bildirib.
2024-cü ilin martında Avropa Liqasının 1/8 finalında Ağdam klubu "Bayer 04"ə iki oyunun nəticəsinə (2:2, 2:3) görə məğlub olub.
2023/2024 mövsümündə "Qarabağ"ın heyətində 16 matça çıxan A.Lunyov bunların 5-də qapısını toxunulmaz saxlayıb. O, 2024-cü ilin yayında Moskva təmsilçisi "Dinamo"ya transfer olunub.
