“Yarış çətin keçdi, Ferstappenin təzyiqinə dözməli oldum”.
Sportinfo.az xəbər verir ki, bunu “Formula 1” üzrə Azərbaycan Qran-prisinin qalibi olan “Red Bull” komandasının pilotu Serxio Peres deyib.
Meksikalı sürücü komanda yoldaşı Maks Ferstappenlə birlikdə yaxşı çıxış etdiklərini bildirib.
O, 2021-ci ildə olduğu kimi, Bakı trekində yenə finişə birinci çatmasına da münasibət bildirib:
“Bakıda iki qələbə? Əslində iki yarım. Təhlükəsizlik maşını çıxanda liderliyi ələ keçirə bildik.
İkimiz də yaxşı sürət yığdıq, hətta bir-iki dəfə divara toxunduq. Maks mənə, həqiqətən də, çətin anlar yaşatdı. Ancaq hər şeyi nəzarətdə saxlamağı bacardım”.
Bu, Serxio Peresin cari mövsüm ikinci uğurudur. O, Səudiyyə Ərəbistanı Qran-prisində də birinci olub.
