“Oyundan sonra azarkeşlərə tərəf getməməyimiz məyus olmağımızla bağlı idi. Başqa səbəb yoxdur”.
“Neftçi”nin futbolçusu Mark Tamaş “Sabah”la oyundan sonra yaşananlar haqda Sportinfo.az-a açıqlama verib.
“Ağ-qaralar” 0:1 hesablı yenilgidən sonra birbaşa paltardəyişmə otağının yolunu tutdu. Lakin bir nəfər də olsun 90 dəqiqə komandanı dəstəkləyən azarkeşlərin yanına gedib onlara təşəkkür etmədi.
Halbuki, qələbədən sonra məşqçi və futbolçular heyəti 3 xalın sevincini tərəfdarları ilə birgə yaşayır.
Məntiqlə, uduzandan sonra da tribunanın qarşısına yaxınlaşıb onlara verdikləri dəstəyə görə təşəkkür etmək və ya məğlubiyyətə görə üzr istəmək ən doğru addım olar.
Macarıstanlı müdafiəçi komandanın adından danışmaqda çətinlik çəksə də, öz adından üzr istəməyi borc bilib:
“Komandanın adından danışmaq mənim üçün çətindir. Çünki hərənin öz fikri var. Uduzduğumuza görə fanatlarımızdan öz adımdan üzr istəyirəm və bildirmək istəyirəm ki, oyundan sonra hədsiz məyus olduğum üçün paltardəyişmə otağına getdim.
Məyusluğumuzun başlıca səbəbi haqq etmədiyimiz məğlubiyyəti almağımız idi. “Sabah”a yenilgini haqq etməmişdik”.
11 oyundan sonra topladığı 15 xalla 5-ci pillədə qərarlaşan “Neftçi” növbəti turda “Qəbələ”nin qonağı olacaq.
HƏBİB
