“Neftçi” Dieqo Qabriel Valdes Samudionu transfer edib.
Bakı klubu bu barədə açıqlama yayaraq, saytımızın ötən həftə tirajladığı məlumatı təsdiqləyib (https://www.sportinfo.az/idman_xeberleri/neftci/178449.html).
29 yaşlı paraqvaylı “ağ-qaralar”la 1+1 il şərti ilə müqavilə bağlayıb. Valdes yeni komandasında 6 nömrəli formanı geyinəcək.
Dieqo Valdez Paraqvayın “San Lorenzo” (2016-2019), “Sol De Amerika” (2020-2021), “Quarani” (2022-2023), “Qvayrenya” (2023) və Meksikanın “Atletiko San Luis” (2019-2021) klublarında çıxış edib,
Paraqvay millisinin heyətində 1 oyun keçirib. Orta sahə oyunçusu 2019-cu ildə Peru ilə yoldaşlıq görüşündə debüt edib.
Cənubi amerikalı Bakıda keçirəcəyi ilk mövsümdə 200 min dollar civarında pul qazanacaq. Klub birillik əməkdaşlıqdan razı qalarsa, gələn ilin yayında anlaşmanın müddətini 1 il də uzadacaq.
Bu zaman müqavilə şərtləri dəyişdiriləcək, paraqvaylı daha çox gəlir əldə edəcək.
“Neftçi” bundan əvvəl milli komandamızın üzvləri – qapıçı Emil Balayev, Xorvatiya əsilli yarımmüdafiəçi Filip Ozobiç, mərkəz müdafiəçiləri – braziliyalı Yuri Matias və macarıstanlı Mark Tamaş, təcrübəli dayaq yarımmüdafiəçisi Qara Qarayev, sağ cinah müdafiəçisi Ervin Koffi, sol vinger Andre Şinyaşiki və hücumçu Aaron Olanareni heyətinə qatıb.
SPORTİNFO.AZ
