"Fərqli futbol mədəniyyətinə sahib komandalarla qarşılaşacağıq".
Sportinfo.az xəbər verir ki, bunu millinin və "Qarabağ"ın müdafiəçisi Bəhlul Mustafazadə "FIFA Series - Edition 2024" layihəsi çərçivəsində keçiriləcək Azərbaycan - Monqolustan oyunundan öncə Tofiq Bəhramov adına Respublika stadionunda təşkil olunan mətbuat konfransında deyib.
O, meydana yüksək əhval-ruhiyyədə çıxacaqlarını bildirib:
"Milli komandada ab-hava yüksək səviyyədədir. Hər şey qaydasında davam edir. Yorğunluğa baxmayaraq, yığmada ikiqat məsuliyyətlə çalışacağıq".
B.Mustafazadə UEFA Avropa Liqasının 1/8 finalda "Bayer 04" ilə keçirdikləri oyunlara (2:2, 2:3) da toxunub:
"Bütün Azərbaycan xalqı "Bayer 04"ə qarşı mübarizəmizdən məmnun qalıb. 100 milyon qiyməti olan futbolçu topu qapıya vura bilmirsə, mənim də qol vura bilməməyim mənə təsir etmir".
Azərbaycan millisi "FIFA series – Edition 2024" turnirində martın 22-də Monqolustan, 25-də isə Bolqarıstan ilə qarşılaşacaq. Hər iki görüş saat 20:00-da Tofiq Bəhramov adına Respublika stadionunda keçiriləcək.