Azərbaycan millisinin baş məşqçisi son illər bir qayda olaraq əcnəbilərə həvalə olunur.

Təbii ki, kifayət qədər yaxşı məvaciblər qarşılığında.

Amma eyni sözləri biz aşağı yaş qruplarını çalışdıran yerli məşqçilər haqqında deyə bilmərik.

Burada vəziyyət acınacaqlıdır.

Bu gün Birinci Liqada 3000, 5000 manat məvacib alan baş məşqçilər olduğu halda ölkənin millilərində çalışan mütəxəssislərin əmək haqqı bəzi hallarda maksimum 2000 manat olur.

Futbol sferası üçün çox aşağı rəqəmdir.

Son dönəmlər millidən çalışan məşqçilərin ikinci iş yerində çalışması da bununla bağlıdır.

Belə ki, U-18 millisinin baş məşqçisi İlham Yadullayev paralel olaraq MOİK-in sükanı arxasındadır.

U-21 yığmasını çalışdıran Ayxan Abbasov həm də "Şamaxı"nın sükanı arxasındadır.

U-16 və U-17 yığmalarında baş məşqçi səlahiyyətlərini icra edən Aqil Nəbiyevin "Şimal"da çalışmaqdan klubun şəraitinə görə imtina etdi.

Düzdü, ilk baxışdan millidə çalışan baş məşqçilərin klubda fəaliyyət göstərməsi aktiv iş həyatında olmaq baxımından faydalıdır.

Amma həm də ciddi zaman itkisidir, zərərlidir.

Millinin üzvlərini izləsin, oyunlarına getsin, yoxsa çalışdığı klubun problemləri ilə məşğul olsun.

Yəqin ki, millidə qazanc yetəri qədər olsa, kimsə ikinci iş axtarmaq barədə düşünməz.

Ümid edək ki, AFFA rəhbərliyi bu barədə bir ölçü götürəcək.

XANOĞLAN İMANOV