Azərbaycan millisinin sabiq üzvü Ruslan Poladov Sportinfo.az-a açıqlama verib.
Hazırda İkinci Liqada çıxış edən "Füzuli"nin şərəfini qoruyan 45 yaşlı müdafiəçi yeni mövsümdən Azərbaycan Premyer Liqasında legioner limitinin ləğv edilməsi qərarını şərh edib.
Təcrübəli futbolçu bu qərarın qorxulu olmadığını bildirib.
"Əslində bu barədə qəti nəsə demək çətindir. Çünki hansı səviyyədə legionerlərin gələcəyi sual altındadır. Nəzərə alaq ki, bir çox klublarımızda infrastruktur baxımından vəziyyət ürəkaçan deyil.
Məncə, bir neçə imkanlı klublar xaric digərləri üstünlüyü yerli futbolçulara verəcək. Belədə akademiyada yetişən uşaqlara daha çox ehtiyac olacaq.
Premyer Liqadan əlavə digər liqalarda da səviyyə artacaq. Düşünürəm ki, qarşısına məqsəd qoyan, çalışan futbolçuya heç bir limit təsir edə bilməz.
Düşüncə və xarakter olaraq yaxşıya doğru dəyişməyimiz vacibdir".
XANOĞLAN
