Azərbaycan badmintonçusu Edi Reski Dviçayo Ukraynanın Xarkov şəhərindəki “RSL Kharkiv International” turnirində gümüş medal qazanıb.
Federasiyanın mətbuat xidmətindən Sportinfo.az-a verilən məlumata görə, mübarizəyə əsas mərhələdən başlayan Dviçayo finala gedən yolda Polşa, Ukrayna, Bolqarıstan, Moldova və Danimarka təmsilçilərinə qalib gəlib.
O, həlledici görüşdə çexiyalı Yan Loudaya 0:2 hesabı ilə uduzub. Turniri ikinci sırada başa vuran idmançı nüfuzlu yarışın gümüş medalını qazanıb.
Yarışda 35 ölkədən 202 badmintonçu mübarizə aparıb. Bu, Azərbaycanın “International Challange” kateqoriyalı turnirlərdə ilk medalıdı.
Mübarizəyə təsnifat mərhələsindən başlayan Ezmi Qoviumuramadhoni isə əsas mərhələyə yüksəlsə də, 1/8 finalda moldovalı Kristian Savinə uduzub.
