Türkiyəni təmsil edən azərbaycanlı yüngül atlet (sprinter) Ramil Quliyev təkcə qazandığı uğurlarla deyil, şəxsi həyatı ilə də diqqət mərkəzinə düşür.
Sportinfo.az xəbər verir ki 28 yaşlı idmançı özündən 7 yaş kiçik ukraynalı Marqarita Duhina ilə ailə həyatı qurub.
Cütlük tez-tez sosial şəbəkədə fotolarını paylaşır və sevgilərini hər kəsə nümayiş etdirir. Onların münasibəti bir neçə ildi davam edir. Marqarita türk vətəndaşlığını da qəbul edib.
Zmanlarının çoxunu səyahətlərdə keçirir, tədbirlərə bir yerdə qatılırlar. 2017-ci ildə London şəhərində baş tutan Dünya Çempionatında, 200 metr məsafəyə qaçış yarışlarında 20.09 saniyə nəticə ilə qızıl medal qazanan Ramil Quliyev dünya çempionu olan birinci Türkiyə idmançısı kimi tarixə düşüb.
2016-cı ildə Amsterdam şəhərində baş tutan Avropa Çempionatında gümüş medala layiq görülüb. O, Azərbaycanı 2008 Pekin Olimpiadasında, Türkiyəni isə 2016 Rio-de-Janeyro Olimpiadasında təmsil edib.
2017-ci ildə baş tutan IV İslam Həmrəyliyi Oyunlarında 2 qızıl və 1 gümüş medal, 2013-cü ildə baş tutan Aralıq dənizi Oyunlarında 2 gümüş medal, 2007-ci ildə baş tutan Avropa Gənclər Olimpiya Festivalında isə 1 qızıl və 1 bürünc medal qazanıb. 200 metr məsafəyə qaçış yarışlarında dünyanın ən güclü ağ dərili idmançısı hesab olunur.
