“Neftçi”nin vitse-prezidenti Elnur Eyvazov vəzifəsindən ayrılıb.
Bakı klubu bu barədə “feysbuk“ səhifəsi vasitəsilə paylaşım edərək, saytımızın 2 gün öncə yaydığı informasiyanı təsdiqləyib.
Bildirilib ki, vitse-prezident öz istəyi ilə tutduğu postdan azad edilib.
Klub bu illər ərzindəki fəaliyyətinə görə ona təşəkkürünü bildirib: “Bizimlə çalışdığı 7 il ərzində göstərdiyi xidmətlərə görə Elnur Eyvazova təşəkkür edir və gələcək fəaliyyətində uğurlar diləyirik!”
Elnur Eyvazov 2016-2017-ci illərdə “Neftçi”nin icraçı direktorunun maliyyə məsələləri üzrə müavini vəzifəsində çalışıb.
O, 2017-ci il iyulun 6-da klubun təsisçisi tərəfindən qəbul edilən qərar əsasında baş verən struktur dəyişikliyindən sonra vitse-prezident vəzifəsinə təyin olunmuşdu.
Elnur Eyvazov bundan sonra biznes sferasında çalışacaq. Bildiyimizə görə, ona SOCAR-da vəzifə təklif edilsə də, bununla razılaşmayıb.
SPORTİNFO.AZ
