COP29

Azərbaycan yığması Avropa çempionu olmasa, faciə sayılacaq?

30 May 00:40 Milli komanda 276
Azərbaycan yığması Avropa çempionu olmasa, faciə sayılacaq?

Sportinfo.az xəbər verir ki, Azərbaycan Minifutbol Federasiyasının icraçı vitse-prezidenti Taleh Nəsibov qarşıdan gələn Avropa çempionatı barədə danışıb.

- Komandamız hazırda təlim-məşq toplanışındadır. Millimiz toplanış çərçivəsində Monteneqroda mini turnirdə iştirak etdi və çempion oldu. 2022-ci ildə qazandığımız titulu qorumaq istəyirik. Bu, əlbəttə ki, çətin olacaq. Amma əlimizdən gələni edirik, milli komandamız üçün hər cür şərait yaratmışıq. Digər komandalar bizi lider kimi qəbul edir. Rəqiblər artıq Azərbaycan millisinə başqa gözlə baxır. Bizimlə oyunlara daha yaxşı hazırlaşırlar. Minifutbol üzrə Azərbaycan çempionatı canlı yayımlanır. Bu da rəqiblərə millimizi təhlil etmək üçün fürsət yaradır. Qrupda rəqiblərimiz Belçika, İtaliya və Fransadır. Əminəm ki, biz yüksək xalla qrupdan lider çıxacağıq. Ümid edirik ki, çempion olaraq geri dönəcəyik.

- Azərbaycan Minifutbol Federasiyasının ayrıca stadionu nə vaxt olacaq?

- Bu, vəsait tələb edir. Artıq plan və layihə var. Maddi çətinliklər var ki, onların üzərində iş gedir. Yaxın gələcəkdə mətbuata bu barədə açıqlama veriləcək.

- Avropa çempionluğu həmin arenanın inşasını tezləşdirə bilər?

- Yəqin ki, böyük təsiri olacaq. Bunun üzərində işlər görülməsi üçün zəmin yaradacaq.

- Komanda Avropa çempionu olmasa, faciə sayılacaq?

- Hər idmançı yarışa çıxanda qızıl medalı fikirləşməlidir. Məncə, 1-ci yer ən böyük uğurdur. Digər yerlər isə ürəkaçan deyil. Biz daha yaxşısına layiqik. Futbolçularımız da məsuliyyəti dərk edirlər. Hər kəsin beynində çempionluqdur.

- Ölkədə minifutbola maraq artır. Coğrafi arealı genişləndirməyi planlaşdırırsız?

- Regionlarda komandaların sayının artmasının üzərində çalışırıq. Həmçinin, müəyyən yaş qruplarında da çempionatların təşkil olunmasını istəyirik. Çünki gələn ildən U-23 dünya və Avropa çempionatları keçiriləcək. Biz də ora milli komanda hazırlamağa start verəcəyik.

Digər Xəbərlər
Xəbər Lenti