"Qarabağ" və digərləri...

Azərbaycan futbolunda adiləşən frazadır.

O qədər adiləşib ki, kölgəsində gizlənməyi bacaranlar da yox deyil.

Elə həmin digərlərinə - "Sabah", "Zirə", "Neftçi", "Araz-Naxçıvan" kimi iri büdcəli klublarımaza aiddir sözüm.

21-ci əsrdir, indi klublarımızın günü peraşki dövrü ilə müqayisə olunmayacaq dərəcədə yaxşılaşıb.

Adıçəkilən klubların 10 milyondan başlayıb, 30 milyona qədər qalxacaq maliyyə resursları var.

Təkcə artan pul, yaxşılaşan şəraitdir.

Nəticələr yerində sayır.

Məsələn, 1999-cu ildə Avropa səhnəsində bir mərhələ adlamağı uğur sayırdıq. Hətta ikinci mərhələdə gələn darmadağına göz yumacaq qədər.

Təəssüf ki, bu gün klublarımız eyni təfəkkürdə davam edir.

Ən pisi odur ki, futbol ictimaiyyətinin mütləq əksəriyyəti də onların nağıllarına inanır.

Debütant "Araz-Naxçıvan"ın 1 mərhələ adlaması uğurdur, "Zirə"nin rəqibi güclü idi, "Sabah" "Çelye"yə qarşı layiqli mübarizə apardı və.s

Ayıbdır! Qurtarın bu nağılları.

"Qarabağ"ın son 8 ildə iki dəfə ÇL-də oynamasından utanın.

Malta, San Marino, Cəbəllütariq klublarının Konfrans Liqasında çıxış etməsindən xəcalət çəkin.

Mən artıq neçə ildir davasını döyürəm ki, qurtaraq bəhanələri.

"Zirə", "Sabah", "Araz-Naxçıvan", "Neftçi" kimi büdcəli klublarımız Konfrans Liqasının qrupunda olmalıdır! Birmənalı olaraq.

Hətta illərdi təklif edirəm ki, "Qarabağ"ın başını buraxıb, bunların yaxasına çökmək lazımdır.

Niyə eyni yolu gedə bilmirsiniz deyə...

Pulunuz, diliniz qədər dilçəyiniz niyə yoxdur?

Bacarmırsınızsa barı avrokuboklara vəsiqə üçün milyonları əcnəbilərə yedizdirməyin, xətti dəyişin, akademiyanın problemlərini həll edin. Bəlkə ölkə futboluna yararlı 3-5 azərbaycanlı yetişdirmiş oldunuz.

XANOĞLAN İMANOV