.jpg)
Azərbaycan millisinin hücumçusu Mahir Emreli karyerasını Xorvatiyada davam etdirəcək.
25 yaşlı forvard Zaqreb “Dinamo”suna keçib.
“Legiya” ilə müqaviləsini qarşılıqlı razılaşma ilə pozan forvard yeni klubu ilə 4,5 illik müqavilə imzalayıb.
2021-ci ilin yayında “Qarabağ”dan Polşa klubuna keçən Mahir 33 matçda 11 qola imza atıb.
Polşa mətbuatı bildirib ki, onun keçidi 1 milyon avroya gerçəkləşib. Lakin Xorvatiya klubu onun üçün pul ödəməyəcək.
Məsələ ondadır ki, Polşa klubunun “Dinamo”ya borcu qalıb. Lirim Kastratini 1,2 milyon avroya transfer edən “Legiya” zaqreblilərə cəmi 200 min ödəyib.
Vəsaitin digər hissəsinin əvəzində isə Emrelinin transferi reallaşıb. Yığmamızın üzvü ilə qüvvədə olan müqaviləyə qarşılıqlı razılaşma əsasında xitam verən “Legiya” bunadək ona hər ay 30 min avro maaş ödəyirdi.
Mahir “Dinamo”da da bu qədər qazanacaq. Xorvatiyanın ən titullu klubu yığmamızın üzvünün transfer dəyərini də müəyyənləşdirib.
Həmyerlimizi almaq istəyən müştəri Zaqreb təmsilçisinə 3 milyon avro ödəməlidir.
SPORTİNFO.AZ
