“Neftçi” Rumıniya millisinin futbolçusu Denis Alibeçi transfer etmək istəyir.
Sportinfo.az-ın “gsp.ro” saytına istinadən məlumatına görə, Azərbaycan klubu bununla bağlı 32 yaşlı hücumçuya təklif göndərib.
“Ağ-qaralar”ın Alibeçə aylıq 50 min avro maaş təklif etdiyi bildirilir. Lakin onun Azərbaycana köçmək ehtimalı o qədər də yüksək qiymətləndirilmir.
Çünki Qətər klubu “Əl-Muaydar” Alibeçə 8 aylıq müqavilə qarşılığında 800 min avro ödəməyə hazırdır.
Futbolçu özü açıqlamasında hələ seçim etmədiyini bildirib. Ancaq o, “Farul”dan ayrılacağını istisna etməyib: “Farul”dan ayrılmaq çətindir.
Ancaq həll etməli olduğum başqa seçimlər var. Transfer hələ dəqiq deyil. Qətərdə isə qaydalarla bağlı bir az sərbəstlik var”.
Denis Alibeçin “Farul”la müqaviləsinin müddəti 2025-ci ilin yayına qədərdir.
