“Bizim üçün çətin oyun oldu.
Açıq demək lazımdır, “Neftçi” bizdən güclü idi və növbəti mərhələyə adlamağı haqq etdi”.
“Jelezniçar”ın kapitanı Aleksandar Kosoriç komandasının “Neftçi” ilə cavab qarşılaşması haqda Sportinfo.az-a danışarkən edib.
İyulun 27-də Sarayevodakı matçın gedişində qonaqlar son saniyələrə qədər hesabda 2:1 öndə idi. Lakin Rəhman Hacıyevin hakimin final fiti ərəfəsində vurduğu qol təmsilçimizə həyat verdi.
35 yaşlı müdafiəçinin fikrincə, mərhələni adlaya bilməməklərində həmin qolun böyük təsiri olub:
“Bakıda hesabda üstün gəlsəydik, hər şey fərqli ola bilərdi. Biz daha inamlı oynayacaqdıq, rəqib isə tələsəcək, səhvlərə yol verəcəkdi.
Hesabdakı üstünlük istər-istəməz bizə xeyir edəcəkdi.Diqqətli olub, o qolu buraxmamalıydıq.
Eybi yox, həyat davam edir. Dediyim kimi, onlar bizdən güclü idi. Bunu etiraf etmək lazımdır”.
Konfrans Liqasının ikinci təsnifat mərhələsində baş tutan “Neftçi”ylə “Jelezniçar” arasındakı ilk görüş 2:2 hesabı ilə başa çatıb.
Cavab qarşılaşmasında 2:0 hesabı ilə qalib gələn təmsilçimiz növbəti mərhələyə yüksəlib.
Bakılılar növbəti mərhələdə “Beşiktaş”la qarşılaşacaq. İlk matç avqustun 10-da Bakıda, cavab oyunu bir həftədən sonra İstanbulda keçiriləcək.
HƏBİB
