“Neftçi”dən ayrılan Voislav Stankoviçin yeni iş yeri müəyyənləşməsi haqda məlumat vermişdik.
4 il “ağ-qaralar”ın şərəfini qorumuş 35 yaşlı müdafiəçi karyerasını vətənində davam etdirəcək.
O, Pançevo şəhərinin “Jelezniçar” klubu ilə anlaşıb. Müqavilə müddəti “1+1” şərti ilə nəzərdə tutulub.
“Jelezniçar”ın 76 yaşı olmasına baxmayaraq, ötən mövsüm birinci dəstədə çıxış edib və çempionatın yekununda ikinci pilləni tutaraq tarixində ilk dəfə elitada çıxış etmək imkanı qazanıb.
2014-15 mövsümünün ikinci yarısında “İnter”in (indiki “Şamaxı”), 2015-ci ildən 2019-cu ilə qədər “Qəbələ”nin, son 4 ildə isə “Neftçi”nin uğurları üçün tər tökmüş serbiyalı müdafiəçi bu müddətdə Premyer Liqada 201 oyunun iştirakçısı olub, 9 qolla yadda qalıb.
O, “Neftçi”nin formasında bütün turnirlərdə meydana çıxdığı 126 qarşılaşmada 8 qol vurub.
HƏBİB / SPORTİNFO.AZ
