“Yoldaşlıq görüşlərində əldə etdiyimiz nəticələrə görə çox sevincliyik”.
Azərbaycan millisinin və “Neftçi”nin kapitanı Emin Mahmudov Sportinfo.az-a açıqlamasında yığmanın Moldova və Şimali Makedoniya üzərindəki qələbələrdən sonrakı durumu haqda danışıb.
30 yaşlı yarımmüdafiəçi təkcə qələbə qazandıqlarına görə yox, həm də yığmanın məzmunlu futbolla istəyinə çatdığına görə şaddır:
“Biri var təsadüfi qələbə, biri də var onu haqq etmək. Fikrimcə, hər iki oyunda özümüzü yaxşı tərəfdən göstərməyi bacardıq.
Fikir verdinizsə, vurulan qollar da düşünülmüş hücumların nəticəsi idi. İstər standart vəziyyətlər, istər cinah asmaları, istərsə də əks-hücumlar üzərində işləmişdik.
Bir sözlə, yaxşı futbolla uğurlu nəticələr qazandıq. Bunun qarşıdakı işıqlı günlər üçün siqnal olduğunu düşünürəm. Məqsədimiz tutduğumuz yolu bu cür davam etdirməkdir”.
Emin Mahmudov Azərbaycan millisinin formasını geyindiyi 36 qarşılaşmada rəqib qapılarına 9 dəfə yol tapıb.
HƏBİB