"Qarabağ"ın əlcəzairli legioneri Yassin Benzia komandanın təlim-məşq toplanışında iştirak etmir.
Sportinfo.az xəbər verir ki, o, bu səbəbdən "Kəpəz"lə yoxlama matçını da buraxıb.
Hətta 30 yaşlı yarımmüdafiəçi qış hazırlığı başlasa da, hələ də Azərbaycana qayıtmayıb.
"Qarabağ"ın baş məşqçisi Qurban Qurbanov bu gün jurnalistlərə bunun səbəbləri barədə danışıb.
Mütəxəssis açıqlamasında bildirib ki, Benzia anasının səhhətinin yaxşı olmadığına görə Bakıya qayıtmayıb:
"Anasının durumu ağırdır. Ona görə hələ qayıtmayıb. Xəbər göndərdi və biz də razılaşdıq ki, hələlik anası ilə olsun. Nə vaxt geri qayıdacağı hələ bilinmir".
Y.Benzia 2023-cü ilin yayından Ağdam təmsilçisinin formasını geyinir.
