Azərbaycan yığması UEFA Millətlər Liqasının qrup mərhələsinin sonuncu - VI turunun Lüksemburqla oyunundan (0:0) sonra Bakıya tam heyətlə qayıda bilməyib.
Koronavirusa yoluxmuş milli üzvləri - Təmkin Xəlilzadə və Rahil Məmmədov Xorvatiyada, kapitan Maksim Medvedev isə Lüksemburqda qalıb. Hər 3 futbolçu test nəticələri neqativ çıxanadək sözügedən ölkədə karantində olacaqlar.
Komandanın baş məşqçisi Canni De Byazi isə ölkəsi İtaliyaya yollanıb.
Xəlilzadə ilə Məmmədovda Monteneqro ilə matçdan (0:0) öncə infeksiya aşkarlanıb. Medvedevdən götürülən test nümunəsi isə qrupun son matçından əvvəl müsbət nəticə verib.
Azərbaycan yığması səfərə 29 futbolçu ilə çıxmışdı. Redaksiyamıza daxil olan məlumata görə, əslində, qafilədə yer alanlar arasında xəstəlik simptomu tapılanların sayı daha çoxdur.
Bu, yalnız futbolçulara aid deyil. Onların Bakıda bir daha həkim qəbuluna yazılması nəzərdə tutulub.
SPORTİNFO.AZ