Azərbaycan yığmasının UEFA Millətlər Liqasının qrup mərhələsi çərçivəsində Lüksemburqla qarşılaşacağı “Jozi Bartel” stadionunda və onun ərazisində təhlükəsizlik tədbirləri gücləndirilib.
Sportinfo.az xəbər verir ki, millimiz gecə-gündüz müşayiət olunur.
Komandamızın qaldığı otelin qarşısında daimi polis patrulu yerləşdirilib. Yerli federasiya dronlardan istifadənin qadağan edilməsi üçün Nəqliyyat Nazirliyinə müraciət edib. Nazirlik stadion yaxınlığında vəziyyətin izləniləcəyini bildirib.
2018/19 mövsümündə Avropa Liqasının qrup mərhələsinin “Düdelanj” – “Qarabağ” oyununda (1:4) ermənilər tərəfindən təxribat törədilmişdi.
Matçın birinci hissəsində Ağdam klubunun 30-cu dəqiqədə vurduğu ikinci qoldan sonra stadionun üzərinə dronla separatçı rejimin bayrağı gətirilmişdi. Millimizin Lüksemburqda xüsusi qorunması da məhz həmin təxribatla əlaqədardır.
Lüksemburq – Azərbaycan matçına Bakı vaxtı ilə saat 23:45-də start veriləcək.