“Sabah”ın yarımmüdafiəçisi Ozan Can Kökçü karyerasını Türkiyədə davam etdirə bilər.
"Akşam"ın iddiasına görə, o, “Beşiktaş”ın maraq dairəsindədir.
İstanbul təmsilçisi əvvəlcə U-21 millimizin üzvünün qardaşı Orkun Kökçünü heyetinə qatmaq niyyətində idi. Ancaq “Beşiktaş” “Feyenord”da çıxış edən orta sahə oyunçusu ilə razılığa gələ bilməyib.
Bunun ardından “ağ-qaralar” Ozan Can Kökçünü transfer etməyi planlaşdırır. Baş məşqçi Sergen Yalçının gənc oyunçulara çalışmaq istədiyi və rəhbərlikdən futbolçunun alınmasını tələb etdiyi bildirilir.
Sportinfo.az xəbər verir ki, Ozanın “Sabah”la müqaviləsi 2021-ci ildə başa çatır. O, paytaxt klubuna ötən il “Giresunspor”dan keçib. Türkiyəli həmkarlarımızın yaydığı xəbərə reaksiyalar birmənalı deyil.
Menecer Erkin İbrahimovun qeydləri ilə tanış olaq: “Bu Ozan Can Kökçü da boş dura bilmir. Pandemiya olsun, apokalipsis olsun - Ozan və ailəsi yenə tanış jurnalistlər vasitəsilə onu hansısa tanınmış kluba "transfer" edəcək.
Özü də bir qayda olaraq, bu nağıllar hər il may-iyun aylarında təkrarlanır. Bir ara guya, "Tottenhem" ilə "Arsenal" Kökçü uğrunda "müharibə" aparırdı, sonda Türkiyənin 1-ci divizion klubuna keçdi.
Nə yaxşı, artıq nisbətən sakitləşib, indi APL nəhənqlərini deyil, maksimum "Beşiktaş"ı hədəf alır. Gələn il da yəqin adını süni olaraq "Qarabağ" ilə hallandıracaq. Bir də gördüz, "Qaradağ-Lökbatan"a keçdi.
Berti Foqts Polşa yığmasına, Roman Qriqorçuk Kiyev "Dinamo"suna gedən kimi, Kökçü da tanınmış bir kluba keçəcək".