Azərbaycan millisinin DÇ-2022-də iştirak etməyəcəyi rəsmiləşib.
Canni de Byazinin komandası artıq indidən turnirə qatılmaq xəyalı ilə vidalaşıb.
Bu, Avropa zonası üzrə seçmə mərhələnin VI turundan sonra baş verib.
Portuqaliyaya 0:3 hesabı ilə uduzan yığmamızın möcüzədən asılı olan nəzəri şanslarının üzərindən Serbiya xətt çəkib. Balkanlılar İrlandiya səfərində 1 xal qazanıblar - 1:1.
Bununla da 1 xala malik Azərbaycanla liderlərdən uzaq düşüb. Portuqaliya 13, Serbiya 11 xalla autsayderlər üçün əlçatmazdır.
Bu isə o deməkdir ki, Azərbaycan qalan üç oyununun hamısında qalib gəlsə belə, nəinki 1-ci, heç 2-ci yeri də tuta bilməyəcək.
Avropa zonasında qrup qalibləri Qətər-2022-yə birbaşa vəsiqə qazanacaq. İkinci yer sahibi olan 10 komanda Millətlər Liqasından gələcək iki yığma ilə pley-off mərhələlərində 3 yer üçün mübarizə aparacaq.
AFFA indi De Byazi ilə vidalaşmağın yollarını axtarır. İtalyan çalışdırıcı da iş yerini tərk etməyin əleyhinə deyil.
Təbii ki, quru “salam-sağol” qarşılığında deyil. Apenninli seçmə mərhələnin sonunadək nəzərdə tutulan müqaviləsinə qarşılıqlı xitam verilməsi üçün təzminat tələb edir.
Onun özü və köməkçilərinə görə istədiyi məbləğ 500 min avrodur.
SPORTİNFO.AZ