.jpg)
Azərbaycan millisi bu gün növbəti oyununu keçirəcək.
Sportinfo.az xəbər verir ki, yığmamız ötən ay başlanan təlim-məşq toplanışı çərçivəsində sonuncu sınağına çıxacaq.
Canni de Byazinin komandası Moldovada meydan sahibləri ilə üz-üzə gələcək. Kişinyovdakı qarşılaşma italiyalı məşqçilərin dueli kimi diqqət çəkir.
De Byazinin başçılıq etdiyi milli vaxtilə ölkəmizdə “Neftçi”ni çalışdıran həmyerlisi Roberto Bordinin komandası ilə üz-üzə gələcək.
Son 4 görüşdə meydanı qolsuz tərk etməyən milli uğurlu seriyanın davamına köklənib. Millimiz həm də ardıcıl ikinci qələbə qazanmaq niyyətindədir.
Millimiz hazırlıq çərçivəsində Türkiyəyə 1:2 hesabı ilə uduzub, Belarusa eyni hesabla qalib gəlib.
De Byazi bildirib ki, bütün oyunlar çətin keçir: "Hamısına eyni ciddiliklə hazırlaşırıq. Rəqibi analiz etmişik. Güclü və zəif tərəflərini bilirik. Son oyunumuzdur, bundan sonra istirahətə gedəcəyik. Yaxşı oyun göstərmək istəyirik".
İtaliyalı mütəxəssis bu qarşılaşmada da əsas heyət üzvlərinə şans verəcəyini söyləyib: "Komandanın inkişafı üçün eyni oyunçuların birlikdə oynaması daha faydalıdır.
Sabah da eyni şey olacaq. Yeni komandayıq. Millinin qapısı hər kəsin üzünə açıq olduğu kimi, hər zaman bağlana da bilər. Hamı əlindən gələni etməlidir".
