Azərbaycan İdman Jurnalistləri Assosiasiyasının (AİJA) təşkilatçılığı və ETOPAZ-ın baş sponsorluğu ilə ümummilli lider Heydər Əliyevin 100 illiyinə həsr olunmuş idman jurnalistləri arasında şahmat turniri keçirilib.

Sportinfo.az xəbər verir ki, Məmmədyarovlar şahmat məktəbində baş tutan yarışda "İdman" TV, "CBC Sport" televiziya kanallarının, "Xalq qəzeti", "Olimpiya dünyası", "Futbol+" qəzetlərinin, Sportinfo.az, Sportmedia.az və Allsport.az saytlarının təmsilçiləri iştirak edib.

Dairəvi sistem üzrə 7 turda keçirilən turnirdə bütün rəqiblərinə qalib gələn Allsport.az saytının baş redaktoru Kamran Hacı çempion olub. Sportinfo.az saytının şef-redaktoru İlkin Fikrətoğlu ikinci, Sportmedia.az saytının baş redaktoru İlkin Vidadioğlu üçüncü yeri tutub.

Yarışın sonunda iştirakçılar mükafatlandırılıb.

Mükafatları AİJA prezidenti, əməkdar jurnalist Eldar İsmayılov və Məmmədyarovlar şahmat məktəbinin təsisçisi, qadınlar arasında beynəlxalq dərəcəli qrossmeyster Zeynəb Məmmədyarova təqdim ediblər.

Eldar İsmayılov ulu öndərin Azərbaycan mediasının inkişafındakı misilsiz rolundan və jurnalistlərə daimi diqqətindən danışıb.

Zeynəb Məmmədyarova isə Ümummili Liderin Azərbaycan idmanının və şahmatının tərəqqisində göstərdiyi xidmətlərdən bəhs edib və media nümayəndələrinə gələcək fəaliyyətlərində uğurlar arzulayıb.