Əmək və əhalinin sosial müdafiəsi naziri Sahil Babayev Azərbaycan Boks Federasiyasının (AFB) prezidenti seçildikdən sonra bu sahənin inkişafına ümidlər yaransa da, baş verənlər bunun əksini göstərir.

Sportinfo.az xəbər verir ki, boks üzrə məşqçi Ramin Məmmədzadə qaynarinfo-ya bildirib ki, hazırda Azərbaycan boksu inkişafa deyil, tənəzzülə doğru gedir.

Onun sözlərinə görə, boks sahəsində vəziyyətin heç də ürəkaçan olmadığı bu ilin aprelində Avropa çempionatında daha qabarıq görünüb.

"Boksçularımız 2 medalla qayıtdılar. Buna inkişaf demək olmaz. Bu, uğursuzluqdur və bunun günahı heç də boksçularda və məşqçilərdə deyil", deyə Ramil Məmmədzadə vurğulayıb.

Məşqçi bildirib ki, boksçulara diqqətin az olması komandanın psixoloji durumuna mənfi təsir edir:

"Təsəvvür edin, səfər pulu deyilən qonorar var. İdmançılar yarışa gedəndə verirlər. Adicə səfər pulu belə, yubadılır, idmançılar səfərdən qayıtdıqdan aylar sonra verilir. Halbuki bu pul artıq yarışa gedəndə verilməlidir. Bu kimlərəsə adi bir şey kimi görünə bilər. Amma idmançıları qələbəyə motivasiya etmək baxımından əhəmiyyətlidir".

O, boks məkətəblərindəki vəziyyətə də toxunub:

"Xeyli sayda istedadlı uşaqlar tanıyıram. Amma imkansızlıqdan məşq edə bilmirlər. Çünki bu gün zala getdinsə, ayda 30-40 manat civarında pul ödəməlisən. Elə uşaq var ki, bunu ödəmək imkanı yoxdur. Məşqçi də o imkanın sahibi deyil ki, hansısa istedadlı uşağın ödənişini özü etsin. Çünki məşqçilərə verilən maaş da böyük məbləğ deyil. Mən hələ onu demirəm ki, vaxtilə boksla məşğul olub, sonradan bu sahədən gedən və iş tapmayıb çarəsizlikdən məşqçi işləyənlər var. Onlar sadəcə olaraq bir qarın çörək qazanmağı düşünürlər. Bu düşüncə, bu psixoloji vəziyyətlə yaxşı boksçu yetişdirmək mümkün deyil".

Əmək və əhalinin sosial müdafiəsi naziri Sahil Babayev Azərbaycan Boks Federasiyasının prezidenti seçiləndə ümidləndiyini deyən Ramil Məmmədzadə sonradan vəziyyətin dəyişmədiyinin şahidi olduğunu bildirib:

"Düşündüm ki, boksa diqqət artacaq. Regionlarda boks məktəbləri inkişaf etdiriləcək. Peşəkar məşqçilər cəlb ediləcək, "aylıqlar" yığışdırılacaq və s. Həmin vaxt mətbuatda boksdakı problemləri də qabartdım ki, nazirin diqqətinə çatsın. Lakin müşahidələrim göstərir ki, heç bir dəyişiklik gözləməyə dəyməz. Mənim özümü qəbul elədilər, məşqçilər kollegiyasına daxil edəcəklərini dedilər. Bu vədin üzərindən aylar keçib, heç bir xəbər yoxdur. Zəng vururam, deyirlər geri dönüş edəcəyik. Amma əlaqə saxlamırlar. Məcburiyyətdən fərdi məşqlər keçirəm. Zallar açıblar, bu yaxşı haldır. Amma bu zallarda da məşqlər pulludur. Yaxşı bəs imkanı olmayanlar nə etsin? Onsuz da fərdi məşqlər ödənişlədir. Kimin pulu varsa, məşq edir. Heç olmasa zallarda məşqləri pulsuz etsinlər".

Ramil Məmmədzadə boksdakı problemlərlə bağlı ölkə rəhbərliyinə müraciət etmək niyyətində olduğunu bildirib.