Qurban Qurbanov artıq sevinə bilər.
Nəhayət, komandası uzun seriyadan sonra bir oyunu qol buraxmadan tamamladı.
«Qarabağ» cari mövsümə bir sıra problemlərlə başlayıb və bu, ən çox müdafiə zonasında özünü göstərir.
Avrokubklardakı rəqibləri demirəm, əvvəl Premyer Liqa iştirakçıları «Qarabağ»ın qapısına 1 dəfə yol tapanda, bunu 7 gün, 7 gecə bayram edirdi.
Həmin futbolçu bir həftə yata bilmir, sevincindən göydə uçurdu.
Bu, ötən «futbol ili»nə kimi belə idi, indi tam əksidir.
«Kəpəz» və «Neftçi»dən başqa liqanın 6 təmsilçisi «Qarabağ»a qol vurub. «Şamaxı» da adını həmin siyahıya adını yazdırmağa çox yaxın idi, məqamı qaçırdılar.
Qurbanov bu yay qapı xəttinə 4 transfer etdi. Güman ki, qış fasiləsində 2 müdafiəçi də aldıracaq.
Yaxşı bir sözü var onun. Deyir ki, toplananların yeri dəyişsə də, cəm dəyişmir.
Arxa xətdə hər dəfə fərqli cütlükləri sınasa da, görürük ki, səhvlər halqası azalmır. Artıq aydındır - Kevin Medina, Bəhlul Mustafazadə və Bədavi Hüseynovla problemin həlli imkansızdır.
Medina «canlı bomba»dır. Mustafazadə mövqe xətalarına çox yol verir.
Hüseynov yaşlıdır, çatdırmır. Odur ki, yeni legionerlərin gəlişi qaçılmazdır.
ELXAN
