Çempionlar Liqasının 3-cü təsnifat mərhələsinin cavab oyununda “Qarabağ”a 2:7 hesabı ilə məğlub olan “Ludoqorets” antirekorda imza atıb.

Sportinfo.az xəbər verir ki, indiyədək avrokuboklarda Bolqarıstanı təmsil edən heç bir kollektiv avrokuboklarda doğma meydanda qapısından 7 top buraxmayıb.

Buna qədər ən zəif göstərici 1977-ci ildə Kuboklar Kubokunda "Anderlext"ə (Belçika) 1:6 hesabı ilə uduzan "Lokomotiv"ə (Sofiya) məxsus olub.

Bundan başqa, Sofiya “Slaviya”sı 1988-ci ildə Serbiya “Partizan”ına, "Liteks" isə 1998-ci ildə Rusiyadan "Spartak"a (Moskva) 0:5 hesabı ilə yenilib. Hər iki görüş UEFA Kubokuna təsadüf edib.

“Ludoqorets”in avrokuboklardakı ən böyükhesablı məğlubiyyəti isə ötən mövsüm Konfrans Liqasının qrup mərhələsində qeydə alınıb.

Razqrad təmsilçisi Danimarkada “Norşellan”a 1:7 hesabı ilə uduzub. Klub, həmçinin 2016-cı ildə Çempionlar Liqasında, 2019-cu ildə isə Avropa Liqasında, müvafiq olaraq, "Arsenal" (İngiltərə) və "Espanyol"la (İspaniya) matçlarda 6 cavabsız top buraxıb.

“Qarabağ” III təsnifat mərhələsində “Ludoqorets”ı iki oyunun nəticəsinə əsasən 8:4 hesabı ilə məğlub edərək, pley-offa vəsiqə qazanıb. “Köhlən atlar” bu raunnda Xorvatiyadan "Dinamo" (Zaqreb) ilə qarşılaşacaq.

Acınacaqlı məğlubiyyətin şokundan yavaş-yavaş ayılan “Ludorets” azarkeşlərini müraciət etməyi lazım bilib.

Klubun “Qarabağ”dan alınan 2:7-yə görə yazılan üzrxahlıq mesajında bu sözlər yer alıb:

“İsti dəstəyə görə sağ olun! Çətin vaxtlarda komandanı necə dəstəkləməyin lazım olduğunu göstərən adamlara təşəkkür edirik.

Bağışlayın! Bizi öldürməyən hər şey bizi gücləndirir. Yalnız “Ludoqorets!”.