Avrokubok mövsümü başlar-başlamaz yenə diqqətlər "Qarabağ"a yönəlib.

Ağdam klubu ilk mərhələdəcə növbəti uğura imza atıb.

Ağdam təmsilçisi tarixində 11-ci dəfə avrokubokların qrup mərhələsinə vəsiqə qazanıb. "Köhlən atlar" bu növsüm ən pis halda Konfrans Liqasının qrup mərhələsində mübarizə aparacaq.

Bu "Qarabağ" ilə bağlı məsələnin başqa bir tərəfidir. Qurban Qurbanovun komandası uğurları ilə yanaşı, futbolçuları ilə də ön plana çıxır.

Artıq Azərbaycan çempionunun futbolçularına Avropada böyük maraq var.

Məsələn, "Linkoln" ilə cavab görüşündə (5:0) het-trik edən braziliyalı futbolçu Juninyo formada olduğunu nümayiş etdirib. O, belə davam etsə, yəqin ki, daha çox klubun maraq dairəsinə düşəcək.

Belə olan halda "Qarabağ" həm Juninyonu, həm də digər futbolçuları qorumaq məcburiyyətində olacaq.

Çünki bir sıra aparıcı oyunlçuların müqaviləsi mövsümün sonuna qədərdir. Bu o deməkdir ki, "köhlən atlar"ın onları itirmək ehtimalı var.

Elə Juninyonun özü ilə yeni sözləşmə imzalamağa ehtiyac var. 27 yaşlı futbolçu ilə anlaşmanın müddəti 2026-cı ilin yayına qədər olsa da, ona olan böyük maraq "Qarabağ"ı çətin vəziyyətə sala bilər. Yeni sözləşmədə yüksək transfer maddəsi qoymaqla klub özünü sığortalaya bilər.

Müqaviləsi gələn yay başa çatacaq futbolçulardan biri Yassin Benziyadır. Əlcəzairli yarımmüdafiəçi ötən mövsümkü çıxışı ilə əvvəki illərini xatırlatdı. Eyni zamanda o, illər sonra ölkəsinin milli komandasına qayıtdı. Belə vəziyyətdə ona Fransa və bir sıra ərəb ölkələrinin klublarından maraq yarandı. 29 yaşlı pleymeker yeni mövsümə də yaxşı başlayıb. Bu o deməkdir ki, "Qarabağ" ehtiyatı əldən verməməlidir.

Budan əlavə müdafiə xəttinin liderləri Kevin Medina, Mark Veşoviç, yarımmüdafiəçi Patrik Andrade və ehtiyat qüvvə kimi komandaya faydalı olan, eyni zamanda universallığı ilə seçilən Mateus Silvanın müvqavilələri mövsümün sonunda başa çatacaq. "Qarabağ"ın uğurlu çıxışı bu futbolçuların da maraq dairəsinə düşməsinə səbəb olacaq. Xüsusilə Ağdam təmsilçisinin üzvləri son zamanlar tez-tez Türkiyə və ərəb klublarının diqqətini cəlb edirlər. Bu da onların yaxşı şərtlərlə təklif alması ilə nəticələnə bilər.

"Qarabağ" son illərdə olduğu kimi - Kadi Borges nümunəsi kimi işini ehtiyatlı tutmalıdır. "Qarabağ" heç bir futbolçusunu havayı əldən buraxmamalıdır.

Heybət