Sportinfo.az İsraildə "Makkabi"nin (Petah Tikva) formasını geyinən Azərbaycan millisinin yarımmüdafiəçisi Əli Babayevin müsahibəsini təqdim edir:
- Koronavirus pandemiyası ilə əlaqədar İsraildə ümumi vəziyyət necədir? Evdən çölə çıxa bilirsinizmi?
- İsraildə vəziyyət nisbətən yaxşıdır. Yalnız supermarket və aptekə getmək üçün evi tərk etmək icazəsi var. Komandadakı fitness məşqçimizdən məşq planını almışıq və evdə ona uyğun hazırlaşırıq.
- Futbolçu üçün belə həyat tərzi darıxdırıcı deyil?
- Cansıxıcı həyat tərzidir. Futbolda ötrü çox darıxmışam. Futbol mənim üçün peşədən savayı həm də bir yoldur. Futbol həyatdır.
- Hazırkı vəziyyət sizə psixoloji baxımdan mənfi təsir etmir?
- Xeyr, psixoloji cəhətdən elə bir təsiri yoxdur. Əksinə, vəziyyət məni daha da gücləndirir. İndi təhlillər aparmağa, harada səhv etdiyimlə bağlı düşünməyə vaxtım çoxdur. Bütün bunları daha yaxşı olmaq üçün edirəm.
- Özünüz koronavirusla bağlı hansı tədbirləri görmüsünüz?
- İndiki vəziyyətdə tələb çox sadədir: özünü qoru, maskanı, əlcəyini tax, gigiyenik qaydalara əməl et. Başqa nəsə etməyə ehtiyac yoxdur.
- İsrailin birinci liqasında 28 turdan sonra çempionat dayandırılıb. Mübarizənin bərpası nə zamana planlaşdırılır?
- Bəli, 28-ci turdan sonra çempionat dayandırıldı. Mayın əvvəlində məşqlərə qayıdacağımıza ümid edirik. Mükəmməl keçən mövsümü meydanda başa vurmaq istəyirik.
- Komandanız hazırda 1-ci pillədə qərarlaşır. Çempionat bərpa edilməsə, elitaya yüksələcəksiniz?
- Mövsüm davam etdirilməsə, hansı qərarın veriləcəyini bilmirəm. Ancaq ümid edirəm ki, qalan oyunları da keçirər, missiyamızı tamamlayarıq. İsrail Futbol Assosiasiyasının hansı qərarı qəbul edəcəyini səbirsizliklə gözləyirik.
- "Makkabi"də müntəzəm çıxış edirsiniz. Petah Tikva klubunda işləriniz necə gedir?
- Oyunlarda ilk "11-lik"də yer aldığım və komandanın kapitanı olduğum üçün çox məmnunam.
- Yenidən Azərbaycan millisinə çağırılmağınız gözlənilirdi. Oyunlar dayandırılmamışdan əvvəl AFFA-dan Malta toplanışına dəvət almamışdınız?
- Xeyr, təxirəsalmalardan əvvəl heç kim mənimlə əlaqə saxlamamışdı. Əgər mənimlə danışsalar, təlim-məşq toplanışına qatılmağımı istəsələr, çox xoşbəxt olaram.
- Nikola Yurçeviçin rəhbərliyi altında məşq etdiniz, ötən ilin martında Litva ilə yoldaşlıq görüşündə oynadınız. Xorvatiyalı yığmamızda niyə uğursuz oldu?
- Açığı, uğursuzluğun səbəbini bilmirəm. Millimiz AVRO-2020-nin püşkatması zamanı çox çətin qrupa düşdü. Rəqiblər yüksək keyfiyyətə malik idilər. Yurçeviçin yüksək peşəkarlığını vurğulamalıyam. Ondan çox şey öyrəndim.
- Yenidən Azərbaycan millisindən dəvət gözləyirsiniz?
- Əlbəttə. Yeni baş məşqçi yığmanın bir parçası olmağımı istəsə və dəvət göndərsə, yığmanın formasını böyük hörmətlə geyinər, layiqincə təmsil etməyə çalışaram.
- Azərbaycan çempionatını izləyirsiniz?
- Keçmiş komandam "Sumqayıt"ın oyunlarını izləməyə davam edirəm. Bu klubdakı insanları çox sevirəm. Həm də orada oynayan Əmir Ağayevlə hər gün zəngləşirik.
- Azərbaycan Premyer Liqası səviyyə baxımından İsrailin yüksək liqası, yoxsa sizin oynadığınız birinci liqa gücündədir?
- Düşünürəm ki, İsrail çempionatının səviyyəsi daha yüksəkdir. Məsələn, "Qarabağ" kimi komanda İsrail yüksək liqasında yaxşı inkişaf edə bilər.
- Ötən ilin yayında "Sumqayıt"dan ayrılmağınız gözlənilməz oldu. İsrailin aşağı liqa komandasına keçməyə sizi nə vadar etdi?
- "Sumqayıt"da davam etmək istəyirdim. Bu komandadan çox xoşum gəlirdi. Klubu və oradakı insanları sevirəm. Ayrılmağımın maliyyə ilə əlaqəsi yox idi. Sadəcə, ailəmlə birlikdə olmaq üçün İsrailə qayıtdım.
- Mövsüm bitdikdən sonra yenidən Azərbaycana qayıtmaq variantını necə dəyərləndirirsiniz?
- "Makkabi" ilə müqavilə müddətim davam edir. Burada hər şey mənim üçün yaxşı və əyləncəlidir. Ancaq gələcəkdə nələrin baş verəcəyini bilmirəm, bəlkə Azərbaycan çempionatına qayıdacağam. Heç nəyi istisna etmirəm.
- "Makkabi"yə keçməmişdən əvvəl adınız "Neftçi" ilə hallanırdı. Həmin vaxt hansısa klubumuzdan təklif almışdınız?
- Azərbaycanın bir neçə klubu ilə danışıq olmuşdu. Ancaq razılıq əldə edilmədi. Daha sonra Petah Tikva "Makkabi"sindən əlaqə saxladılar. Onların təklifini qəbul etdiyim və bu böyük kluba keçdiyim üçün şadam (apasport.az).