Almaniyada təşkil olunan futbol üzrə Avropa çempionatında bu gün 1/4 finalın son oyunları keçiriləcək.

Sportinfo.az xəbər verir ki, günün ilk matçı Düsseldorfdakı "Esprit Arena"da İngiltərə və İsveçrə komandaları arasında olacaq.

İngiltərə millisi 1/8 finalda Slovakiyanı 2:1 hesabı ilə məğlub edib. İsveçrə isə İtaliya yığmasından üstün olub - 2:0.

İtaliyalı referi Daniele Orsatonun idarə edəcəyi matç saat 20:00-da başlayacaq.

İngiltərə və İsveçrə milliləri böyük yarışların (Avropa və dünya çempionatlarının) final mərhələlərində indiyə qədər üç dəfə üz-üzə gəliblər.

Komandaların final mərhələlərində ilk qarşılaşması 1954-cü ildə keçirilən dünya çempionatına təsadüf edib.

DÇ-1954-də 4-cü qrupda yer alan komandaların görüşündə İngiltərə yığması 2:0 hesablı qələbəyə sevinib. 1996-cı ildə keçirilən Avropa çempionatının final mərhələsində isə rəqiblər meydandan 1:1 hesablı bərabərliklə ayrılıblar. Komandaların final mərhələlərindəki son qarşılaşmaları AVRO-2004-də olub. Həmin vaxt İngiltərə yığması rəqibini məğlubiyyətə uğradıb - 3:0.

Ümumiyyətlə, İngiltərə millisi İsveçrəyə qarşı keçirdiyi son 24 matçda cəmi 1 dəfə məğlub olub. İsveçrə yığması bu rəqibi üzərində sonuncu dəfə 1981-ci ilin mayında, dünya çempionatının seçmə mərhələsində keçirilən oyunda qələbə qazanıb - 2:1.

Günün nəticəsi səbirsizliklə gözlənilən digər görüşündə Türkiyə yığması Niderlandla üz-üzə gələcək. Bu, komandaların böyük yarışların final mərhələlərində ilk görüşü olacaq. Tərəflər arasında baş tutan son iki matçda (Avropa çempionatının seçmə mərhələsi) 13 qol vurulub. 2021-ci ilin martında Türkiyə (4:2), sentaybrında isə Niderland (6:1) qələbə qazanıb.

20:00.İngiltərə - İsveçrə

Baş hakim: Daniele Orsato (İtaliya).

Düsseldorf, "Esprit Arena".