Peşəkar Futbol Liqası (PFL) Premyer Liqanın V turunun “Qarabağ” - “Səbail” oyununun təxirə salınması barədə dünən rəsmi açıqlama yayıb.
Təşkilatçı qurum elan edib ki, qeyri-müəyyən vaxta təxirə salınan matçın tarixi sonradan dəqiqləşəcək.
Bildirilib ki, qarşılaşmanın təxirə salınması AFFA-nın istəyi ilə gerçəkləşib. Assosiasiya PFL-a müraciət edərək, yığmanın Millətlər Liqasındakı növbəti iki matçına daha yaxşı hazırlaşması məqsədilə oyunun təxirə salınmasını istəyib.
AFFA-nın müraciətini, millinin mənafeyini və adıçəkilən klubların razılığını rəhbər tutan qurum görüşün təxirə salınmasına qərar verib. Millimiz oktyabrın 10-da Monteneqro ilə səfər, 13-də Kiprlə ev oyunu keçirəcək.
Sportinfo.az-a bununla bağlı yeni məlumat daxil olub. AFFA-dan redaksiyamıza ötürülən xəbərə görə, bu matçın təxirə slınması təşəbbüsü Canni De Byazidən gəlib.
Yığmanın baş məşqçisi “Qarabağ”ın son 3 həftədə çox sıx qrafiklə meydana çıxmasını əsas götürüb.
Bu da başadüşüləndir. Çünki millinin əsas qüvvəsini Ağdam klubunun futbolçuları təşkil edir və onların düşərgəyə yorğun gəlməsi italyan mütəxəssisi hədsiz qayğılandırır.