Azərbaycan millisinin sabiq oyunçusu Ruslan Abışov peşəkar karyerasını başa vurub.

Sportinfo.az xəbər verir ki, müdafiəçi 36 yaşında futbolla vidalaşıb.

O, sosial şəbəkə hesabında video paylaşaraq vidasını açıqlayıb.

Ruslan Abışov "Neftçi"nin yetirməsidir. Arxa xətt oyunçusu karyerası ərzində "Rubin" (Rusiya), "Xəzər Lənkəran", "Qəbələ", "İnter" (indiki "Şamaxı") və "Sabah"da çıxış edib. Abışov son mövsümü "Zirə"də keçirib.

Ruslan Abışovun vida paylaşımını diqqətinizə çatdırırıq:

"Əziz azarkeşlər, buradan sizinlə futbolçu kimi sağollaşmaq istəyirəm!!!

Əslində könül istərdi ki, əynimdə yetirməsi və qatı azarkeşi olduğum “Neftçi” formasıyla futbolla və sadiq azarkeşlərlə vidalaşım. Amma qismət deyilmiş.

Futbol karyeramın ilk günündən bu günə kimi birgə çalışdığım hər kəsə - məşqçilərimə, komanda yoldaşlarıma, bütün azarkeşlərə, jurnalistlərə (xüsusilə idman jurnalistlərinə) və bir sözlə üzərimdə əməyi olan hamıya sonsuz təşəkkürümü bildirirəm!"