COP29

Yenə "Neftçi"… Çox suallara aydınlıq gətirəcək, nəfəslər kəsiləcək!

19 Aprel 22:00 Premyerliqa 2 203
Yenə "Neftçi"… Çox suallara aydınlıq gətirəcək, nəfəslər kəsiləcək!

Premyer Liqanın 31-ci turunda nəfəslər kəsiləcək.

Mövsüm sona yaxınlaşdığından hər bir oyunun yekun hesabı səbrsizliklə gözlənilir.

Turun mərkəzi qarşılaşması aprelin 20-də baş tutacaq ki, “Zirə” öz meydanında avrokuboklara vəsiqə və gümüş medal yolundakı əsas rəqibi “Neftçi”ni qəbul edəcək.

“Neftçi” martın 3-dən bu yana...

Son həftələrdə hər iki komandanın formada olması qarşılaşmaya marağı artırır. “Ağ-qaralar” Premyer Liqada keçirdiyi son 5 oyunda uduzmayıb. 3 matçda qalib gəlib, 2 görüşdə heç-heçə edib. Miodraq Bojoviçin rəhbərlik etdiyi kollektiv çempionatda sonuncu məğlubiyyətini ayyarım əvvəl, martın 3-də “Qarabağ”dan alıb. Bu zaman kəsiyində “Qarabağ”a daha bir yenilgi qeydə alınıb. Lakin bu, Premyer Liqada yox, ölkə kubokunda baş verib.

...”Zirə” 4 oyundur uduzmur

Mövsümün gedişində uzun müddət qələbə qazana bilməyən zirəlilər isə qış fasiləsindən sonra sürət yığıb. “Qartallar” da sonuncu yenilgisini “Qarabağ”dan alıb. Martın 10-da çempiona uduzan qəsəbə təmsilçisi o vaxtdan bu yana yüksək dəstədə meydana çıxdığı 4 qarşılaşmanın 3-nü qalibiyyətlə başa vurub, 1-də bərabərə qalıb. Üstəlik, ölkə kubokunun yarımfinalında “Qəbələ”ni üstələyib. Hər iki komandanın uğurlu qrafik cızdığını deyə bilərik.

“Ağ-qaralar”ın üstünlüyü

“Zirə”ylə “Neftçi” arasında cari mövsümdə qeydə alınan statistik göstəricilər ikincilərin xeyrinə işləyir.

Çempionatın ilk 3 dövrəsində üz-üzə gələn kollektivlərin duelindən “ağ-qaralar” üzüağ çıxmağı bacarıb. Payızda Zirədə keçirilən oyun 1:1 hesabı ilə sonuclanıbsa, “Neftçi Arena”da baş tutan digər 2 görüşdə meydan sahibləri qəsəbə təmsilçisini üstələyib. Hər iki halda 1:0 hesabı qeydə alınıb.

“Neftçi” bu oyunu udsa...

Komandalar turnir cədvəlində qonşudurlar. “Neftçi” 46 xalla 2-ci pillədə yer alıb. “Zirə” 44 xalla 3-cü yerdədir.

Bakılıların meydanı qalib kimi tərk etməsi avrokuboklara vəsiqəni təmin etmək yolunda irəliyə doğru böyük addım sayılacaq. Sözsüz, gümüş medalları son turu gözləmədən vaxtından əvvəl bayram etmək üçün də əla imkan yaxalayacaqlar.

Meydan sahibləri qalib gələcəyi halda, tunir cədvəlində əməlli-başlı sıxlıq yaranacaq. “Turan Tovuz” – “Sumqayıt” oyununu də nəzərə alsaq, zirəlilərin qalibiyyəti komandalar arasındakı xal fərqini dəhşətli dərəcədə sıxlaşdıracaq.

Aprelin 20-də Zirə İdman Kompleksində keçiriləcək qarşılaşma saat 19:00-da başlayacaq.

HƏBİB / SPORTİNFO.AZ

Digər Xəbərlər
Xəbər Lenti