Sportinfo.az xəbər verir ki, “Keşlə”nin yeni transferi Tural Axundovun müsahibəsini təqdim edir:

– “Neftçi”dən ayrıldın. Mövsümü gedişində bilirdin ki, komandadan gedəcəksən? Ya yeni təklif oldu, razılıq əldə etmədiniz?

– “Neftçi” ilə müqavilə bitdi və artırılmadı. Buna hörmətlə yanaşıram. Biz futbolçuyuq və öz işimizi görürürk. Açığı, ayrılacağımı gözləmirdim. Çünki “Neftçi”də layiqincə çıxış etdim.

– İlk vaxtlar komandada daha çox oynayırdın, sonra belə olmadı. Səncə, bunun səbəbi nədir?

– Bu barədə nəsə deyə bilmərəm. Daha dəqiqini məşqçilər bilər.

– “Neftçi” karyeranı necə şərh edərdin?

– “Neftçi” böyük klubdu, orada oynamaq mənim üçün şərəfdir. O formanı geyirsənsə, sənə ümidlər çox olur. Komandanın güclü azarkeşi var və meydanda heç vaxt özümü tək hiss etmirdim. Azarkeşlərə alqış düşür ki, daim komandanın yanındadırlar. Onlara minnətdaram.

– Ayrılıqdan dərhal sonra “Keşlə”yə keçdin. Əvvəlcədən danışıqlar var idi?

– “Neftçi”də olduğum vaxtlar təklif qəbul etmirdim. Çünki güclü komandanın şərəfini qoruyurdum və bu, haqsızlıq olardı. Komandanı tərk edən kimi “Keşlə” təklif göndərdi. Dəyərləndirdim və müqavilə imzalamaq qərarına gəldim.

– Avropa Liqasında mübarizə aparacaq komandadasan və düşünürsən ki, burada karyeran uğurlu olacaq?

– Əlbəttə istəyirəm ki, “Keşlə”də uğurlu olum və karyeram davamlı olsun. Başqa klublarda necə can qoymuşamsa, burada da elə olacaq. Yeni komandamla uğurlara imza atmaq istəyirəm. Yaxşı olacağını düşünürəm.

– Mövsümün dayandırılmasını komandaların xeyrinə olan qərar hesab edirsən?

– Bilmirəm ki, bundan sonra necə olacaq. Amma çempionatın dayanması yaxşı oldu. Əgər Premyer Liqa davam etsəydi, çətin olacaqdı, zədələr qaçılmaz idi. Hər şey qismət idi. Qərarlara hörmətlə yanaşmalıyıq (futbolinfo.az).