“Keşlə”nin yarımmüdafiəçisi Sezar Meza Kolli Sportinfo.az-a müsahibə verib:
- Premyer Liqanın 9-cu turunda “Keşlə” “Qəbələ”yə qalib gəldi. İkinci yarıda o qədər də yaxşı oynamasınız da qalib gəlməyi bacardınız...
- Komandamız ilk yarını əla oynadı. İkinci yarıda isə bir az konsentrasiyanı itirdik. Amma istədiyimiz nəticəni qazana bildik. İstədiyimiz də elə üç xal idi.
- "Neftçi” “Sumqayıt” matçından əvvəl 2-ci pillədəydiniz. Amma Sumqayıtda qeydə alınan nəticə istədiyiniz kimi olmadı.
- Bizim məqsədimiz öz oyunlarımızı qələbə ilə başa vurmaqdır. Ancaq öz oyunlarımızı fikirləşirik.
- Növbəti turdakı rəqibiniz “Səbail” olacaq. Son dörd oyunun hamısında uduzan rəqibinizi məğlub edə biləcəksiniz?
- "Səbail”ə qarşı oyunumuz da çətin alınacaq. Əlimizdən gələni edəcəyik. Çünki qalib gələrək aktivimizə növbəti xalları yazdırmaq istəyirik. Meydana qalib gəlmək üçün çıxacağıq.
- "Keşlə”nin əsas məqsədi avrokuboklara vəsiqə qazanmaqdır. Bunu reallaşdıra biləcəksiniz?
- Bayaq dediyim kimi indi fikirləşdiyimiz qarşıdakı oyunu qalib başa vurmaqdır. Biz hər oyundan sonra növbəti oyunu fikirləşirik. Yaxşı nəticələr qazanmağı isə çox istəyirik.
- Hazırda Azərbaycan Premyer Liqasının bombardiri Lorenzo Frutosdur. Həmyerlinin çempionatı bombardir kimi başa vuracağına inanırsan?
- Frutosun adına çox sevinirəm. Ümid edirəm ki, "Tito" bu seriyanı davam etdirəcək. Komandaya kömək edəcəyinə, bombardirlər sırasında olacağına inanıram.
- Azərbaycanda qardaşın Derlis Deyvid Meza Kolli ilə həm birlikdə, həm də rəqib kimi oynamısan. Onun işləri indi necədir? “Petrolul”dan ayrılıb Azərbaycana qayıtmaq istəyir?
- Derlislə tez-tez danışıram. Amma biz futboldan yox, başqa şeylərdən, həyatdan söhbət edirik. O, “Keşlə”nin hazırkı çıxışına görə şad olduğunu bildirir. Mənə də uğurlar arzu edir.
- 2013-cü ildən Azərbaycanda oynayırsan. Azərbaycan millisində oynamaq üçün sənə AFFA-dan dəvət gəlib?
- Mən hər zaman meydanda ən yaxşısını etməyə çalışıram. Azərbaycanda artıq hamı mənim nəyə qadir olduğumu, potensialımı yaxşı bilir. Azərbaycan millisinə hər zaman uğurlar arzu edirəm.
Mir BAĞIR