.jpg)
Növbəti mövsüm Premyer Liqada neçə klubun mübarizə aparacağı qarşıdakı 2 ay ərzində dəqiqləşəcək.
Sportinfo.az bu barədə SOCAR rəhbərliyinə yaxın mənbədən məlumat alıb.
Redaksiyamıza verilən qeyri-rəsmi informasiyaya görə, iştirakçı sayının artırılıb-artırılmaması mayın ikinci yarısınadək müəyyənləşəcək.
Bildirilib ki, AFFA-nın yeni rəhbərliyi çempionatla bağlı müxtəlif variantları nəzərdən keçirəcək - yarışmanın 10 komanda ilə davam etdirilməsi də mümkündür, bu sayın 12-yə çatdırılması da.
Aprelin 2-də AFFA-da hesabat-seçki konfransı keçiriləcək. Həmin gün federasiyanın sayca dördüncü prezidentinin kimliyi də rəsmi açıqlanacaq.
Yeganə namizəd Rövşən Nəcəfdir. Və o da SOCAR-dan sonra AFFA-da da Rövnəq Abdullayevi əvəz edəcək.
Saytımıza daxil olan bilgiyə görə, R.Nəcəf Premyer Liqayla əlaqəli yeniliklərin tətbiqində maraqlıdır. Onun bununla bağlı təkliflər paketinin hazırlanmasına tapşırıq verməsi söylənilir.
