.jpg)
Tokio Olimpiadasında bu gün çıxış edən sərbəst güləşçilərimizdən ikisi yarımfinala yüksəlib. Qadınların yarışında çempionluğa əsas namizədlərdən olan Mariya Stadnik (50 kq) ilk görüşdə Stalvira Orşuşa (Rusiya) qalib gəlib - 11:7.
1/4 finalda Stadnik tunisli Sara Həmdini asanlıqla üstələyərək yarımfinala çıxıb - 10:0.
İndi Mariyanı əsas rəqibi, yaponiyalı Yuyi Susaki ilə "ölüm-dirim" qarşılaşması gözləyir.
Kişi sərbəst güləşçilərin yarışında isə təmsilçilərimizdən Hacı Əliyev (65 kq) yarımfinala vəsiqə qazanıb. O, ilk görüşdə seneqallı Adam Diattaya 4:0, 1/4 finalda isə Daulet Niyazbəyova (Qazaxıstan) 9:1 hesabıyla qalib gəlib.
Yarımfinalda Hacı Hindistan pəhləvanı ilə güləşəcək. Olimpiya çempionumuz Şərif Şərifov isə təəssüf ki, yenə Abdulrəşid Sadullayev səddini aşa bilməyib. Keçən olimpiadanın yarımfinalında və 2 il əvvəlki dünya çempionatının finalında olduğu kimi Şərif yenə 4 qat dünya və Avropa çempionu ilə mübarizədə məğlub olub. Sadullayev finala çıxacağı halda, Şərif təsəlliverici görüşlərdə iştirak hüququ qazanacaq.
SPORTİNFO.AZ
.jpg)
