Ötən mövsümün sonunda "Keşlə"dən ayrılan və Braziliyada "San-Kaetano"ya keçən Denis Silva Azərbaycanın rəsmi dövlət qurumlarına şikayət ünvanlayıb.
Sportinfo.az-ın məlumatına görə, 33 yaşlı legioner ölkəmizdə çıxış etdiyi 11 il ərzində dəfələrlə fırıldağa məruz qaldığını və müqavilə şərtlərinin yerinə yetirillmədiyini açıqlayıb.
"San Kaetano" Paulista ştatının A-2 seriyasında çıxış edir. 3 qat Azərbaycan çempionu olan Denis 4 dəfə ölkə kubokunu da qazanıb.
Müxtəlif vaxtlarda "Xəzər Lənkəran", "Neftçi" və "Keşlə"nin formasını geyinən «sambaçı» məktubunda göstərib ki, bu illər ərzində üst-üstə 300 min dollara yaxın pulu ödənilməyib.
Denis ən çox "Xəzər Lənkəran"ın şərəfini qoruduğu 2008-2010-cu illər aralığında müqavilə üzrə ona çatacaq vəsaiti ala bilmədiyini ərizəsində qeyd edib.
Braziliyalının çoxsaylı şikayət məktubları baxılması və araşdırılması üçün AFFA-ya göndərilib. Federasiya mənsubları bundan sonra Denis Silva ilə əlaqə yaradıb, problemin öyrənilməsi və həllinə çalıcaşaqlarına söz veriblər.