Millimizin sabiq üzvü Yunis Hüseynov "Favorit" verilişinin qonağı olub. Sportinfo.az xəbər verir ki, hazırda AFFA-nın Texniki Direktorunun müavini işləyən veteran futbolçu maraqlı əhvalatlar danışıb.
Hüseynov "AVRO-96"nın 1995-ci ildə keçirilmiş Azərbaycan - Fransa oyununda (0:2) baş vermiş hadisəni xatırlayıb:
"O vaxt Fransanı Trabzonda qəbul edirdik. Jan Pyer Papeni tutmaq Rasim Abuşova tapşırılmışdı. Fransızlar küncdən zərbəni yerinə yetirir, mən də dirəyin yanında dayanmışam. Birdən Rasimin səsini eşitdim:
- Yunis, Papeni görmədin?
- Gördüm, bayaq avtobusdan düşürdü.
- A kişi, məzələnmə.
- Bax, indi Papen yerin altından çıxacaq və qol vuracaq.
Doğrudan da həmin anda cərimə meydançasında peyda olan Papen başla qol vurdu. Top tordan keçəndə Rasimin səsini eşitdim: "Bu Papen hardan çıxdı?"