Premyer Liqa təmsilçilərinin Antalyaya axını davam edir.
Cığıraçan rolunu “Zirə” oynamışdı. Rəşad Sadıqovun çalışdırdığı komanda yanvarın 5-də Bakını tərk etmişdi.
Yanvarın 10-da isə “Neftçi” qardaş ölkəyə yola düşdü.
Daha 3 komanda isə yanvarın 12-si səhər saatlarında havaya qalxacaq. Söhbət “Qarabağ”, “Sumqayıt” və “Sabah”dan gedir.
İşin maraqlı tərəfi bu 3 komandanın məşqçi və futbolçu heyətinin eyni təyyarənin göyərtəsində yer alacağıdır. Belə ki, adları çəkilən komandalar çərşənbə günü 07:55-ə nəzərdə tutulan Bakı-Antalya reysi ilə birbaşa ünvana uçacaq.
Halbuki, “Neftçi”ylə “Zirə” Bakı-İstanbul-Antalya reysindən yararlanmaq məcburiyyətində qalıb.
“Qəbələ” yanvarın 15-də Antalyaya yollanacaqsa, “Səbail”lə “Keşlə” qış hazırlığını Azərbaycanda keçəcək.
HƏBİB / SPORTİNFO.AZ