Cari mövsümdə 3 qol vuran "Keşlə"nin yeni hücumçusu Lorenzo "Tito" Frutos Sportinfo.az saytına müsahibə verib:
- Premyer Liqanın dördüncü turunda "Səbail"ə evdə məğlub oldunuz. Görüşü özünüz üçün necə dəyərləndirirsiz?
- "Səbail"lə oyun gözlədiyimiz kimi keçmədi. Qələbə qazanmaq istəyirdik, bunun üçün çox çalışdıq. Ancaq bəxtimiz gətirmədi və uduzduq. Buna görə çox təəssüflənirik.
- Niyə uduzduz? Bəxtiniz gətirmədi, yoxsa rəqibdən zəif oynadınız?
-Öz səhvlərimizə görə xalsız qaldıq. Rəqib ilk şansından yararlandı. Sonra da penaltidən qol buraxdıq. "Səbail" birinci hissədə iki qol vurdu. "Keşlə" daha üstün oynadı. Təəssüf ki, 1 xal da ala bilmədik.
- “Səbail”lə görüşdə qollarının sayını 3-ə çatdırdın. Mövsümü bombardir kimi başa vurmaq şanslarını necə qiymətləndirirsiz?
- Vurduğum qollara görə özümü xoşbəxt hiss edirəm. Əlbəttə, bu mövsüm bombardir olmaq istərdim. Amma ən önəmlisi hər oyunda komandama kömək etməkdir.
- Növbəti turda “Keşlə”nin rəqibi “Neftçi” olacaq. Hədəf üç xaldır, ya 1 xal da sizi razı salacaq?
- Yalnız qələbə haqqında düşünürük. Hər oyuna rəqib kim olur-olsun, 3 xal üçün çıxırıq. “Neftçi” əla komandadır. Onlar da qələbə qazanmaq istəyirlər. Məncə, maraqlı oyun olacaq.
- Komandanın bu mövsüm məqsədləri nədir?
- Xəyalım Çempionlar Liqasında oynamaqdır. Ən yüksək səviyyəyə çatmaq üçün sona qədər mübarizə aparacağıq. Hədəfiimiz Avropa Liqasıdır və buna nail olmaq istəyirik.
- “Keşlə”nin hücum xətti zəif oynamasa da, müdafiə qənaətbəxş təsir bağışlamır. Demək olar ki, komandaya yeni gələn oyunçular tam adaptasiya olmayıblar?
- Məncə, müdafiədə də yaxşıyıq. Sadəcə “Səbail”lə oyunda bir az bəxtimiz gətirmədi. Həmin oyundan əvvəl cəmi bir qol buraxmışdıq. Komandamız əla vəziyyətdədir və bütün çempionat boyu mübarizəyə hazırıq.
Mir BAĞIR