“Qarabağ”ın futbolçusu Bəhlul Mustafazadə Avropa Liqasının qrup mərhələsinin 6-cı turunda “Hekken”i məğlub edərək pley-offa yüksəldikləri matçdan (2:1) sonra jurnalistlərə açıqlama verib.
Sportinfo.az xəbər verir ki, müdafiəçi əvvəlcə oyunun çətin keçdiyini deyib:
“Gərgin oyun oldu. İkinci hissənin çoxunu azlıqda keçirdik. Buna baxmayaraq, qələbə qazanmaq istəyirdik və qazandıq.
Qələbə ilə birlikdə pley-offa vəsiqə qazana bildik. Çox böyük xoşbəxtlik keçiririk. Bunun davamını gətirmək üçün çalışacağıq”.
O, pley-offda arzuladığı rəqibi də qeyd edib:
“Arzum, əlbəttə ki, “Milan”la oynamaqdır. Amma fərq etməz hansı gələcək.
Hamısı güclü rəqiblərdir. Hansı ilə düşsək, maksimum nəticə üçün çalışacağıq”.
10 xalla qrupu 2-ci pillədə başa vuran “Qarabağ” 1/16 finalda “Qalatasaray” (Türkiyə), “Lans” (Fransa), “Braqa” (Portuqaliya), “Benfika” (Portuqaliya), “Feyenoord" (Niderland), “Yanq Boyz" (İsveçrə), "Milan" (İtaliya) və ya "Şaxtyor"a (Ukrayna) rəqib olacaq.
Bu mərhələnin püşkatma mərasimi dekabrın 18-də keçiriləcək.