Dünya çempionatının Avropa zonası üzrə seçmə mərhələsinin qrup oyunlarından sonra statistik göstəricilər açıqlanıb.
Sportinfo.az xəbər verir ki, 4 qolla tsiklda millimizin bombardiri olan Emin Mahmudov bu göstəricidə 23-39-cu yerləri bölüşdürür.
Qrup mərhələsinin bombardirləri 12 qolla niderlandlı Memfis Depay və ingiltərəli Harri Keyndir.
Mahmudov yığma karyerasında ilkə imza atıb. Qətərlə Bakı Olimpiya Stadionunda keçirilən görüşdə (2:2) iki qola imza atan yarımmüdafiəçi milli forması ilə ilk dəfə dubl edib.
Bununla da Emin 2021-ci ildə vurduğu qolların sayını 7-yə çatdırıb. O, özünün bu matçadək də sahibi olduğu rekordu yeniləyib. Mahmudova qədər heç bir oyunçumuz bir ildə 4-dən artıq qol vurmamışdı.
Emin bununla da yığma karyerasındakı ümumi qol sayını 8-ə çatdırıb. Millinin “8 nömrə”si bu göstəricidə 3-cü yerə şərik çıxıb.
Mahmudov Dmitri Nazarovla eyni sayda qol vurub. Emin yalnız Qurban Qurbanovla (14) Vaqif Cavadovdan (9) geri qalır.