“Qarabağ”la oyun üçün Bakıya səfər edən “Nant”ın heyətində fransalı futbolçular çoxluq təşkil etsə də, komandada xeyli sayda legioner görmək mümkündür.

Braziliya, İspaniya, Kamerun, Nigeriya, Konqo və Misir kimi ölkələrdən 10-a yaxın əcnəbi gözə dəyir.

Aralarında azərbaycanlı futbolsevərlərə kifayət qədər yaxından tanış olan sima isə misirli Mustafa Mohameddir.

“Qalatasaray”dan tanıdığımız, 2021-ci ilin yanvarından 2022-ci ilin yayına qədər sarı-qırmızı formanı geyinmiş 24 yaşlı hücumçu hazırda “Nant”da çıxış edir. İstanbul nəhəngi misirlini Fransaya 1 illik icarə əsasında göndərib.

Mustafa yeni komandasında yerli azarkeşlərin sevgisini qazanmaqdadır.

Cari mövsümdə Liqa 1-də 7 oyunun hamısında iştirak edən səbəbkar 369 dəqiqə meydanda olub. O, bu müddətdə 2 qola imza atıb, daha 2 qolun ötürməsini verib.

Avropa Liqasının qrup mərhələsində “Olimpiakos”la sentyabrın 8-də baş tutan qarşılaşmada start heyətində yer alan Mohamed 90 dəqiqə meydanda olub və komandasına oyunda hesabı açmaqla kömək edib.

İyulun 31-də PSJ ilə superkubok görüşündə isə 26 dəqiqə meydanda olub.

Misirli forvardın “Qarabağ”la matçda start heyətində yer alacağı gözlənilir.

Ölkəsinin millisində 25 oyunda 9 qol vurmuş Mustafa Mohamed “Qalatasaray”da oynadığı və yerli azarkeşlərin sevgisini qazandığı ilyarım ərzində 58 görüşün iştirakçısı olub ki, bu müddətdə rəqib qapılarından 17 top keçirib, 5 dəfə assist müəllifi olub.

Sentyabrın 15-də Avropa Liqasının qrup mərhələsi çərçivəsində baş tutacaq “Qarabağ” – “Nant” qarşılaşması saat 20:45-də başlayacaq.

HƏBİB / SPORTİNFO.AZ