“Kəpəz” cari mövsümün növbəti sensasiyasına imza atdı.

Elitada qalmaq uğrunda mübarizə aparan Gəncə təmsilçisi “Qarabağ”ı iki dəfə üstələyəndən sonra bu dəfə “Sabah”ı uddu – 1:0.

Premyer Liqada 27, ümumilikdə 32 oyunda uduzmayan “tələbələr”in uğurlu seriyasını məhz “Kəpəz” qırdı.

Bu qələbə təkcə “Sabah”ın seriyasının qırılması deyil, həm də qərb təmsilçisinin qarşıya qoyulan hədəfin – yüksək liqada qalmaq tapşırığının öhdəsindən böyük ölçüdə gəlməsidir.

Beləliklə, “Bank Respublika Arena”da 3 xal aktivinə yazdıran “Kəpəz” 31 turdan sonra xalların sayını 27-yə yüksəldib, 10-cu pillədəki mövqeyini bərkitdi. İndiki məqamda “Kəpəz” “Qəbələ”ni 7 xal qabaqlayır.

Bu gün Qəbələ şəhər stadionunda keçiriləcək “Qəbələ” – “Qarabağ” görüşündə meydan sahibləri qələbə qazana bilməsə, “Kəpəz”in Premyer Liqada qalacağı dəqiqləşəcək.

Hətta heç-heçə belə, gəncəlilərin əhvalını korlamayacaq. Çünki Qəbələdəki mümkün bərabərlik də “sarı-göylər”in növbəti mövsümdə elitada mübarizə aparması anlamına gələcək.

“Qəbələ” “Qarabağ”ı uda bilməsə, o zaman 11-ci yeri qorumaq üçün mübarizə aparacaq. Bu pillənin sahibi mövsümün yekununda I Liqanın 2-cisi ilə bir oyundan ibarət pley-off duelinə çıxacaq.

11-ci yeri qorumağın özü belə kifayət qədər çətin görünür. Məsələn, qəbələlilər ağdamlılara məğlub olsa, “Karvan-Yevlax” Tovuz səfərindən qələbə ilə qayıtsa, autsayderlərin arasındakı xal fərqi 3-ə enəcək.

32-ci turda azarkeşlər “Karvan-Yevlax” – “Qəbələ” oyununa şahidlik edəcək. Həmin matçda yevlaxlıların mümkün qələbəsi ilə xallar bərabərləşə, sonuncu turun matçları ölüm-qalım savaşına çevrilə bilər.

Odur ki, 10-cu yeri böyük ölçüdə əldən verən “Qəbələ” bu gün “Qarabağ”dan heç olmasa 1 xal qoparmalıdır ki, pley-off məsələsini rəsmiləşdirsin. Mümkün 1 xal və “Karvan-Yevlax”ın “Turan Tovuz”a uduzması fonunda çempionatın “quyruğundakı” vəziyyətə aydınlıq gətirəcək.

HƏBİB / SPORTİNFO.AZ