4 oyundur qol və xal üzünə həsrət qalan “Qəbələ” ümidini qarşıdakı oyuna dikib.
Bölgə təmsilçisi bazar günü doğma meydanda “Araz-Naxçıvan”ı qəbul edəcək.
Həmin “Araz-Naxçıvan” ki, baş məşqçisi Elmar Baxşıyevlə köməkçisi Rasim Ramaldanov, eləcə də Ürfan Abbasov, Ülvi İsgəndərov, Tərlan Əhmədli, Felipe Santos, Ramon Maçado kimi futbolçuları vaxtilə “Qəbələ”nin şərəfini qoruyub.
Avrokuboklar uğrunda mübarizə aparan Naxçıvan təmsilçisi ilə elitada qalmağı hədəf seçən qəbələlilərin duelinin gərgin və maraqlı keçəcəyinə şübhə etməyə dəyməz.
“Qırmızı-qaralar”ın qanalı müdafiəçisi İsaak Amoah Sportinfo.az-a danışıb:
“Ardıcıl üç matçı evdə keçirəcəyik. Bu üstünlükdən yararlanmalıyıq.
Artıq neçə oyundur uduzuruq. İtiriləcək heç nə qalmayıb.
Bütün gücümüzü səfərbər etməliyik ki, “Araz-Naxçıvan”la və digər rəqiblərlə görüşlərdən xallarla ayrılaq.
“Araz” güclü rəqibdir, heyətində bacarıqlı futbolçular cəmlənib. Lakin biz də zəif deyilik.
Əvvəlki qarşılaşmalarda buraxdığımız səhvləri təkrarlamasaq, yekunda sevinən tərəf ola bilərik. Qış fasiləsinə qədər xallarımızın sayını artırmalıyıq”.
Noyabrın 30-da Qəbələ şəhər stadionunda gerçəkləşəcək duel saat 16:30-da başlayacaq.
HƏBİB
