"Qəbələ" Azərbaycan Premyer Liqasının 21-ci turunda doğma meydanda "Zirə" ilə 1:1 hesablı heç-heçə edib.

Sportinfo.az xəbər verir ki, "qırmızı-qaralar"ın qolunun müəllifi olan Ülvi İsgəndərov sualları cavablandırıb:

- “Zirə”nin qapıçılarının qəniminə çevrilmisən. Nə məsələdir?

- Qismətdir də. Məşqlərdə uzaqdan zərbələrin üzərində çalışıram. Oyun bizim üçün ağır oldu. Belə olacağını gözləyirdik. "Zirə" yaxşı komandadır.

- "Zirə" ilə matçlarınızda xüsusi aqressiya hiss olunur. Bunun səbəbi nədir?

- Aqressiya yoxdur. İndiki durumumuz onu tələb edir ki, bütün rəqiblərə qarşı aqressiv olaq. Çünki, bizə xallar lazımdır.

- Oyundan əvvəl rəqibin zəif tərəflərini təhlil etmişdiz?

- Əlbəttə. Rəqibdən asılı olmayaq bütün oyunlara ciddi hazırlaşırıq. Hər matçdan öncə bütün komandaları ciddi şəkildə təhlil edirik.

- Səncə vurduğun qol ayın qolu seçiləcək?

- Onu deyə bilmərəm. Ay təzə başlayıb.

- Səncə, bundan yaxşı qol vurulacaq?

- İnşallah. Bilmirəm nə deyim.

- Səncə, “Neftçi”yə də belə qol vura bilərsən?

- Əlbəttə ki, vura bilərəm. Qapıçı öndə olursa, bəxtimi sınayıram. Qolkiper qabaqda deyilsə, komanda yoldaşıma ötürmə edirəm.

- Bu qol daha yaxşı idi, yoxsa Mehdi Cənnətova vurduğun?

- Məncə, Mehdiyə vurduğum. Çünki son dəqiqədə vurmuşdum. O, qol bizə qələbə qazandırmışdı. Həm də tam meydanın mərkəzindən zərbə endirmişdim.

- Uzaq məsafədən qol vurmaq istəyəndə ən çox nəyi nəzərdən keçirirsən? Qapıçının boyunu nəzərə alırsan?

- Yox. Qapıçı qabaqdadırsa, zərbəni endirirəm. Düşünürəm ki, həmin topa çata bilməyəcək.

- Zəhmət olmasa, səmimi cavab ver. Zərbəni vurduqdan sonra, top göydə olanda hiss edirdin ki, qol olacaq?

- Allaha dua edirdim ki, qol olsun.

- Komanda çox çətin durumda idi. 5-6 futbolçunuz yox idi. Özünüzü bu oyuna necə köklədiniz?

- İtirəcəyimiz heç nə yoxdur. Bizə vacib xallar lazım idi. Sonuncu pillədən qurtulmaq üçün oyunlara köklənirik. Kiminsə olub-olmaması o qədər də önəmli deyil.